Masakër/ Familja me tre anëtarë gjendet e therur në shtëpinë e tyre

Një ngjarje e rëndë ka tronditur Irlandën rurale, pasi një çift bashkë me djalin e tyre u gjetën të vrarë me thikë në banesën e tyre të izoluar në Tallanstown, Co. Louth. Viktimat janë identifikuar si Mark dhe Louise O’Connor, të dy në të 50-at, dhe djali i tyre Evan, rreth të 20-ave, i cili vuante nga nevoja të veçanta.

Policia irlandeze konfirmoi se një burrë në të 30-at është arrestuar dhe po mbahet në paraburgim në kuadër të hetimeve për këtë akt kriminal. “Tre persona – dy meshkuj dhe një femër – u gjetën të vdekur në vendngjarje,” thuhet në deklaratën zyrtare të Gardai.

Ngjarja ka shokuar komunitetin lokal, pasi familja ishte e njohur dhe e respektuar në zonë. Një nga postimet e fundit të Mark në Facebook ishte përvjetori i tij i 33-të i martesës me Louise, ku ai shkruante me dashuri për jetën që ndanin bashkë.

Ministri i Drejtësisë, Jim O’Callaghan, deklaroi se nuk ka rrezik për publikun dhe policia nuk po kërkon persona të tjerë të dyshuar. “Kjo është një ngjarje tragjike dhe e ndjeshme. Zemra ime është me familjen dhe komunitetin që po kalon një tronditje të paparë,” u shpreh ai.